تاجیکستان برای حفاظت از مرزهایش، ۲۰ هزار نیروی اضافی به مرز افغانستان اعزام می‌کند
درپی شدت گرفتن جنگ در شمال و شمال شرق افغانستان و سقوط مناطق بیشتر به دست گروه طالبان، دولت تاجیکستان تصمیم گرفته تا با هدف جلوگیری از ورود تروریست‌ها به تاجیکستان، نیروهای بیشتری را در مرز با افغانستان منتقل کند.
نتشر شده در:
گوش کنید - ۰۱:۴۷
از چند هفته بدین‌سو است که جنگ میان جنگجویان طالبان و نیروهای امنیتی افغانستان در ولایت‌های شمالی افغانستان جریان دارد.
درپی این درگیری‌ها، طالبان موفق شده‌اند تا اداره‌ی شماری از ولسوالی‌ها/شهرستان‌ها در شمال افغانستان را بگیرند.
شماری از ولایت‌های شمالی افغانستان از جمله ولایت بدخشان که در روزهای پسین، حضور طالبان در آن گسترش یافته، با تاجیکستان مرز مشترک دارند.
حالا تاجیکستان از پیشروی طالبان تا مناطق مرزی دو کشور نگران شده و تصمیم گرفته تا از مرزهایش با جابه‌جایی نیروی بیشتر حفاظت کند.
امام علی رحمان، رییس جمهور تاجیکستان به تازگی نشست شورای امنیت ملی تاجیکستان را رهبری کرده و در پاسخ به نگرانی‌های امنیتی که از جانب افغانستان متوجه تاجیکستان است، به وزیر دفاع خود دستور داده تا ۲۰ هزار نیروی ذخیره را به مناطق مرزی با افغانستان بفرستد.
رسانه‌های تاجیکستانی گزارش داده‌اند که در چند روز پسین، نزدیک به ۱۵۰۰ سرباز افغانستان پس از درگیری با طالبان، در دسته‌های جداگانه وارد خاک تاجیکستان شده‌اند.
هرچند نهادهای امنیتی افغانستان این خبر را رسما تایید نکرده‌اند، اما رییس جمهور غنی در تماس تلفنی که اخیرا با رییس جمهور تاجیکستان داشته گفته که شماری از شهروندان افغانستان درپی "ظلم و وحشت" طالبان به مناطق مرزی تاجیکستان پناه برده‌اند و تاکید کرده که حکومت وی به زودی اقدامات لازم را به هدف رسیدگی به این شهروندان انجام خواهد داد.
در همین حال، روسیه که نفوذ قابل توجهی در کشورهای آسیای میانه ازجمله در تاجیکستان دارد و از توان نظامی بی‌بدیلی نیز در منطقه برخوردار است، گفته که آماده است در برابر تهدیدهای احتمالی که متوجه تاجیکستان است، اقدام کند.
گزارش زکریا حسنی را از کابل گوش کنید
دریافت رایگان خبرنامهبا خبر-پیامک های ما اخبار را بصورت زنده دریافت کنید
آبونه شوید