ظاهر اغبر: طالبان، خانه‌ها را می‌توانند بسوزانند، اما «روحیه مقاومت» را نه

ظاهر اغبر، سفیر افغانستان در تاجیکستان، طالبان را مسئول به آتش کشاندن خانه‌ پدری خود در ولایت پنجشیر می‌داند و می‌گوید که طالبان می‌توانند خانه‌ها و سازه‌ها را بسوزانند، اما «روحیه مقاومت در برابر ظلم و تروریسم» تزلزل‌ناپذیر باقی خواهد ماند.

ظاهر اغبر، سفیر افغانستان در تاجیکستان © Zaher Aghbar

ظاهر اغبر که از سوی نظام پیشین به عنوان سفیر افغانستان در تاجیکستان گماشته شد، از چهره‌های پشتیبان «جبهه مقاومت» و از مخالفان سرسخت طالبان است.

روز یک‌شنبه ٢١ جوزا، تصاویری از سوختن یک خانه در ولسوالی «رخه» پنجشیر در شبکه‌های اجتماعی نشر شد و سپس رسانه‌های محلی افغانستان گزارش دادند که این خانه متعلق به ظاهر اغبر است.

حالا سفیر افغانستان در تاجیکستان که از زمان برگشت طالبان به قدرت، همانند بسیاری از وزارت‌خانه‌های افغانستان، از وزارت خارجه طالبان دستور نمی‌گیرد، در واکنش به سوزانده شدن خانه خود و با اشاره به حکم‌رانی طالبان می‌گوید که «خانه همه ما، افغانستان بزرگ امروز می‌سوزد در آتش جهل و ستم».

ظاهر اغبر، خانه‌ای که در پنجشیر به آتش کشانده شده را خانه پدری خود می‌خواند و می‌گوید طالبان ممکن خانه‌ها را بسوزانند، اما «روح و اراده» و «روحیه مقاومت در برابر ظلم و تروریسم» مردم افغانستان را سوزانده نمی‌توانند.

پس از سقوط دوباره افغانستان به دست طالبان، سفارت افغانستان در تاجیکستان با رهبری ظاهر اغبر به سوی جبهه مقاومت به رهبری احمد مسعود متمایل شد و به نظر می‌رسد که تاکنون، نقش پررنگی نیز در هماهنگی و برگزاری شماری از نشست‌های جبهه مقاومت در تاجیکستان داشته است.

از سوی دیگر، تاجیکستان نیز که از برگشت طالبان به قدرت، احساس نگرانی و ناامنی می‌کند، برخلاف دیگر همسایه‌های افغانستان، تاکنون حاضر به تسلیم‌دهی سفارت افغانستان به رژیم طالبان نشده است.