دستگیری یکی از مسئولین امنیتی در بدخشان

از مدتی به اینسو، نیروهای امنیتی تاجیکستان، در بدخشان شمالی، دست به یک سلسله عملیات زده اند. این عملیات با کشته شدن عبدالله نظر اف، رئیس امنیت بدخشان تاجیکستان آغاز شد و حکومت این کشور، مرز افغانستان را برای جلوگیری از تردد شورشیان بست.

برای بررسی این مسایل، گفتگویی داریم با داکتر عزیز بارز، دیپلومات سابق افغانی در تاجیکستان. آقای بارز میگوید که این مشکلات با کشته شدن آقای عبدالله نظر اف، رئیس امنیت بدخشان آغاز شد و با کشته شدن رئیس حزب نهضت اسلامی تاجیکستان، شخصی به نام سبز علی، شعله ورتر شد. حکومت تاجیکستان، این قتل را به قاچاقچیان مواد مخدر نسبت داد و به منطقه حمله کرد. شورشیان پامیری در برابر آن مقاومت کردند و چندین روز جنگ ادامه داشت.

در مورد شخصیکه در سمت افغانی بدخشان توسط مسئولین افغانی دستگیر شده است، آقای بارز میگوید که این شخص قاری ودود نام دارد، یکی از فرماندهان سابق حزب اسلامی است و با مقامات امنیتی ولایت کار میکرد. در مورد شورشیان پامیری که در برابر حکومت تاجیکستان مقاومت کردند، آقای بارز میگوید که آنان، از مجاهدین سابق تاجیک استند و در گذشته آنان با دولت یک جا شده و مقداری از اسلحۀ خود را تحویل داده بودند. در میان آنان شخصیت های شناخته شده، قوماندان امام نظر، قوماندان باقر و قوماندان طالب ایم بیگ شهرت دارند.

گفتگو با داکتر عزیز بارز، دیپلومات سابق افغانی در تاجیکستان